SPECIAL STORY : ಕಣ್ಣೀರಲ್ಲಿ ಕೈತೊಳೆಯುತ್ತಿರುವ ಟೊಮೆಟೊ ಬೆಳೆಗಾರರು..!!

ಪ್ರಜಾವೀಕ್ಷಣೆ ಡಿಜಿಟಲ್ ವಿಶೇಷ ಸುದ್ದಿ : 

ಪ್ರಜಾವೀಕ್ಷಣೆ ಡಿಜಿಟಲ್ ಡೆಸ್ಕ್ , ಮಾರ್ಚ್ 12 : ಟೊಮೆಟೊ ಇಂದು ರೈತನ ಪಾಲಿಗೆ ಕಣ್ಣೀರಿನ ಬೆಳೆಯಾಗಿದ್ದು, ಮಾರುಕಟ್ಟೆಯಲ್ಲಿ ದಿಢೀರ್ ಬೆಲೆ ಕುಸಿತದಿಂದಾಗಿ ಟೊಮೆಟೊ ಬೆಳೆಗಾರರು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಹಾಕಿದ ಬಂಡವಾಳವೂ ಕೈಗೆ ಬಾರದೆ ಬೀದಿಗೆ ಬೀಳುವಂತಾಗಿದೆ.

​ಕಳೆದ ತಿಂಗಳವಷ್ಟೇ ಉತ್ತಮ ಬೆಲೆಯ ನಿರೀಕ್ಷೆಯಲ್ಲಿದ್ದ ರೈತರಿಗೆ ಈಗ ಮಾರುಕಟ್ಟೆಯಲ್ಲಿ ದಿಡೀರ್ ಶಾಕ್ ನೀಡಿದೆ. ಒಂದು ಟ್ರೇ ಟೊಮೆಟೊ ಬೆಲೆ ಕೇವಲ 30 ರಿಂದ 40 ರೂಪಾಯಿಗೆ ಇಳಿಕೆಯಾಗಿದೆ. ಅಂದರೆ ಒಂದು ಕೆಜಿ ಟೊಮೆಟೊಗೆ ರೈತನಿಗೆ ಸಿಗುತ್ತಿರುವುದು ಕೇವಲ 2 ರಿಂದ 2.50 ರೂಪಾಯಿ ಮಾತ್ರ!. ಕಟಾವು ಮಾಡಲು ತಗಲುವ ಕೂಲಿ ಮತ್ತು ಮಾರುಕಟ್ಟೆಗೆ ಸಾಗಿಸುವ ಗಾಡಿ ಬಾಡಿಗೆಯೂ ಈ ಬೆಲೆಯಲ್ಲಿ ಸಿಗುತ್ತಿಲ್ಲ ಎಂಬುವುದೇ ವಿಪರ್ಯಾಸ. ಇದರಿಂದ ಆಕ್ರೋಶಗೊಂಡ ರೈತರು ಹಲವೆಡೆ ರಸ್ತೆ ಬದಿಗೆ ಟೊಮೆಟೊ ಸುರಿದು ತಮ್ಮ ಹತಾಶೆ ವ್ಯಕ್ತಪಡಿಸುತ್ತಿದ್ದಾರೆ.

ಈ ​ಸಂಕಷ್ಟಕ್ಕೆ ಕಾರಣಗಳೇನು?

• ​ಅತಿಯಾದ ಇಳುವರಿ : ಹವಾಮಾನ ಪೂರಕವಾಗಿದ್ದರಿಂದ ಈ ಬಾರಿ ನಿರೀಕ್ಷೆಗಿಂತ ಹೆಚ್ಚಿನ ಇಳುವರಿ ಬಂದಿದೆ. ಮಾರುಕಟ್ಟೆಗೆ ಸರಬರಾಜು ಹೆಚ್ಚಾಗಿ ಟೊಮೇಟೊ ಬೇಡಿಕೆ ಕುಸಿದಿದೆ.

• ​ ಕೋಲ್ಡ್ ಸ್ಟೋರೇಜ್ ಕೊರತೆ : ಟೊಮೆಟೊವನ್ನು ಸಂಗ್ರಹಿಸಿಡಲು ಸ್ಥಳೀಯವಾಗಿ ಕೋಲ್ಡ್ ಸ್ಟೋರೇಜ್‌ಗಳಿಲ್ಲ. ಹೀಗಾಗಿ ಬಂದ ಬೆಲೆಗೆ ಮಾರಾಟ ಮಾಡುವುದು ರೈತರಿಗೆ ಅನಿವಾರ್ಯವಾಗಿದೆ.

• ​ಸಂಸ್ಕರಣಾ ಘಟಕಗಳ ಕೊರತೆ: ಟೊಮೆಟೊದಿಂದ ಸಾಸ್ ಅಥವಾ ಪೌಡರ್ ತಯಾರಿಸುವ ಸಣ್ಣ ಕೈಗಾರಿಕೆಗಳು ಈ ಭಾಗದಲ್ಲಿ ಇಲ್ಲದಿರುವುದು ಬೆಲೆ ಕುಸಿತದ ಸಮಯದಲ್ಲಿ ರೈತರಿಗೆ ಮಾರಕವಾಗುತ್ತಿದೆ.

​ಸಾಲದ ಸುಳಿಯಲ್ಲಿ ರೈತರ ಬಾಳು..!

​2 ಎಕರೆ ಟೊಮೆಟೊ ಬೆಳೆಯಲು ಗೊಬ್ಬರ, ಔಷಧಿ, ಪ್ಲಾಸ್ಟಿಕ್ ಮಲ್ಚಿಂಗ್ ಮತ್ತು ಕೂಲಿ ಸೇರಿ ಸುಮಾರು 1 ರಿಂದ 1.5 ಲಕ್ಷ ರೂಪಾಯಿ ಖರ್ಚಾಗುತ್ತದೆ. ಬಹುತೇಕ ರೈತರು ಬ್ಯಾಂಕ್ ಅಥವಾ ಕೈಸಾಲ ಮಾಡಿ ಬೆಳೆ ಬೆಳೆದಿದ್ದಾರೆ. ಈಗಿನ ಬೆಲೆ ನೋಡಿದರೆ ಅಸಲು ಕೂಡ ವಾಪಸ್ ಬರುವ ಲಕ್ಷಣಗಳಿಲ್ಲ ಎಂದು ಗೋಚರವಾಗುತ್ತಿದೆ.

​”ನಾವು ಬೆವರನ್ನೇ ರಕ್ತ ಮಾಡಿ ಬೆಳೆ ಬೆಳೆದರೆ, ಮಾರುಕಟ್ಟೆಯಲ್ಲಿ ಅದಕ್ಕೆ ಕವಡೆ ಕಾಸಿನ ಬೆಲೆ ಇಲ್ಲದಂತಾಗಿದೆ. ಇದೀಗ ಬೆಳೆದ ಬೆಳೆ ರಸ್ತೆ ಪಾಲು, ಧನಕರಗಳಿಗೆ ಮೇವಾಗಲಿದೆ. ಇದರಿಂದ ಲಕ್ಷಾಂತರ ರೂ. ನಷ್ಟವಾಗಲಿದೆ. ಸರ್ಕಾರ ನಮಗೆ ಬೆಂಬಲ ಬೆಲೆ ನೀಡಿದರೆ, ಮರುಜೀವ ಬಂದಂತಾಗುತ್ತದೆ.”

– ನೀಲಪ್ಪ ಕುದ್ರಿಕೋಟಗಿ, ಮ್ಯಾದನೇರಿ ಗ್ರಾಮ.

     ರೈತಸಂಕಷ್ಟಕ್ಕೀಡಾದ ರೈತ.