PV NEWS EXCLUSIVE : ಪ್ರಜಾಸೌಧಕ್ಕೆ ಮತ್ತೆ ಕಾನೂನು ಕಂಟಕ? : 26.5 ಎಕರೆ ಭೂಮಿಯ ಮೇಲೆ ಮಠ, ರೈತರು ಮತ್ತು ಸರ್ಕಾರದ ಸಂಘರ್ಷ ತೀವ್ರ!

PV NEWS ಕನ್ನಡ 24×7 : 

ವರದಿ : ಚಂದ್ರು ಆರ್. ಭಾನಾಪುರ್. 

ಕುಕನೂರು, ಜು. 19 (PV NEWS): ಕುಕನೂರು ಪಟ್ಟಣದ 19ನೇ ವಾರ್ಡಿನಲ್ಲಿರುವ ಗುಡ್ನಪ್ಪನ ಮಠ (ಗುಧ್ನೇಶ್ವರ)ಕ್ಕೆ ಸಂಬಂಧಿಸಿದ (ಮುಜರಾಯಿ ಇಲಾಖೆಗೆ ಸೇರಿದ ಎನ್ನಲಾದ) 26.5 ಎಕರೆ ಜಮೀನಿನ ವಿವಾದ ಹೊಸ ತಿರುವು ಪಡೆದುಕೊಂಡಿದ್ದು, ಪ್ರಜಾಸೌಧ (ಮಿನಿ ವಿಧಾನಸೌಧ) ನಿರ್ಮಾಣದ ಹಿನ್ನೆಲೆಯಲ್ಲಿ ಮತ್ತೊಮ್ಮೆ ಚರ್ಚೆಗೆ ಗ್ರಾಸವಾಗಿದೆ.

ನ್ಯಾಯಾಲಯದ ಆದೇಶವನ್ನು ಗೌರವಿಸದೆ ಅಧಿಕಾರಿಗಳು ಏಕಪಕ್ಷೀಯವಾಗಿ ಕ್ರಮ ಕೈಗೊಳ್ಳುತ್ತಿರುವುದು ಕಾನೂನು ಹಾಗೂ ಪ್ರಜಾಪ್ರಭುತ್ವದ ಮೌಲ್ಯಗಳಿಗೆ ವಿರುದ್ಧವಾಗಿದೆ ಎಂದು ನೀಲಗುಂದದ ಪ್ರಭುಲಿಂಗ ದೇವರು ಹಾಗೂ ಸ್ಥಳೀಯ ಮುಖಂಡರು ಆರೋಪಿಸಿದರು.

ಶನಿವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಈ ಜಮೀನು ಅನಾದಿ ಕಾಲದಿಂದಲೂ ಗುಡ್ನಪ್ಪನ ಮಠ ಹಾಗೂ ಸ್ಥಳೀಯ ರೈತರ ಸಾಗುವಳಿಯಲ್ಲಿದ್ದು, ತಮ್ಮ ಪೂರ್ವಜರ ಕಾಲದಿಂದ ಕೃಷಿ ಚಟುವಟಿಕೆಗಳು ನಿರಂತರವಾಗಿ ನಡೆಯುತ್ತಿವೆ ಎಂದು ತಿಳಿಸಿದರು.

26.5 ಎಕರೆ ಜಮೀನಿನ ಕುರಿತು ಸರ್ಕಾರದ ಯೋಜನೆ

ಸರ್ಕಾರ ಈ ಜಾಗದಲ್ಲಿ ವಿವಿಧ ಆಡಳಿತಾತ್ಮಕ ಕಟ್ಟಡಗಳನ್ನು ನಿರ್ಮಿಸಲು ಯೋಜನೆ ರೂಪಿಸಿದ್ದು, ಅದರಂತೆ 5 ಎಕರೆ ಜಾಗವನ್ನು ಆಡಳಿತ ಭವನ ನಿರ್ಮಾಣಕ್ಕೆ, 5 ಎಕರೆ ಜಾಗವನ್ನು ಜೆಎಂಎಫ್‌ಸಿ (JMFC) ನ್ಯಾಯಾಲಯ ಸಂಕೀರ್ಣಕ್ಕೆ ಹಾಗೂ ಉಳಿದ 16.5 ಎಕರೆ ಜಾಗವನ್ನು ಪ್ರಜಾಸೌಧ (ಮಿನಿ ವಿಧಾನಸೌಧ) ನಿರ್ಮಾಣಕ್ಕೆ ಮೀಸಲಿಡುವ ಪ್ರಸ್ತಾವನೆ ಸಿದ್ಧಪಡಿಸಲಾಗಿತ್ತು ಎಂದು ಅವರು ವಿವರಿಸಿದರು.

ಮೂರು ವರ್ಷಗಳ ಕಾನೂನು ಹೋರಾಟ

ಸರ್ಕಾರ ಭೂಮಿ ಸ್ವಾಧೀನ ಪ್ರಕ್ರಿಯೆ ಆರಂಭಿಸಿದ ನಂತರ ಮಠ ಹಾಗೂ ರೈತರ ಪರವಾಗಿ ನ್ಯಾಯಾಲಯದ ಮೊರೆ ಹೋಗಲಾಗಿತ್ತು. ಪ್ರಕರಣ ದಾಖಲಾದ ಬಳಿಕ ನ್ಯಾಯಾಲಯ ಆರಂಭದಲ್ಲಿ ತಡೆಯಾಜ್ಞೆ ನೀಡಿದ್ದು, ಕಳೆದ ಸುಮಾರು ಮೂರು ವರ್ಷಗಳಿಂದ ಪ್ರಕರಣದ ವಿಚಾರಣೆ ನಡೆಯುತ್ತಿತ್ತು ಎಂದು ತಿಳಿಸಿದರು.

ನ್ಯಾಯಾಲಯದ ಆದೇಶದ ಕುರಿತು ಮುಖಂಡರ ವಿವರಣೆ

ಸುಮಾರು ಎರಡು ತಿಂಗಳ ಹಿಂದೆ ನ್ಯಾಯಾಲಯ ನೀಡಿರುವ ಆದೇಶದಲ್ಲಿ, ಅರ್ಜಿದಾರರಾದ ರೈತರು ಹಾಗೂ ಮಠದವರು ಸಾಗುವಳಿ ಮಾಡುತ್ತಿರುವ ಜಮೀನಿಗೆ ಯಾವುದೇ ರೀತಿಯ ಧಕ್ಕೆಯಾಗದಂತೆ ನೋಡಿಕೊಳ್ಳಬೇಕು ಎಂದು ಸೂಚಿಸಲಾಗಿದೆ. ಉಳಿದ ಸಾರ್ವಜನಿಕ ಅಥವಾ ಸರ್ಕಾರಿ ಹಿತಾಸಕ್ತಿಯ ಜಾಗದಲ್ಲಿ ಮಾತ್ರ ಸರ್ಕಾರ ಕಾಮಗಾರಿ ಕೈಗೊಳ್ಳಬಹುದಾಗಿದೆ ಎಂದು ಆದೇಶದಲ್ಲಿ ಉಲ್ಲೇಖಿಸಿರುವುದಾಗಿ ಮುಖಂಡರು ಹೇಳಿದರು.

“ಲಿಖಿತ ಆದೇಶ ಬರುವ ಮುನ್ನವೇ ಕಾಮಗಾರಿ ನಡೆಸಲಾಗಿದೆ”

ನ್ಯಾಯಾಲಯದ ಆದೇಶದ ಲಿಖಿತ ಪ್ರತಿ ಇನ್ನೂ ಲಭ್ಯವಾಗದಿದ್ದರೂ, “ಮೌಖಿಕ ಆದೇಶ ಬಂದಿದೆ” ಎಂಬ ನೆಪದಲ್ಲಿ ಅಧಿಕಾರಿಗಳು ಪ್ರಜಾಸೌಧ ಕಾಮಗಾರಿ ಹಾಗೂ ಭೂಮಿ ಪೂಜೆ ನಡೆಸಲು ಮುಂದಾಗಿರುವುದು ಕಾನೂನು ಪ್ರಕ್ರಿಯೆಗೆ ವಿರುದ್ಧವಾಗಿದೆ ಎಂದು ಅವರು ಆರೋಪಿಸಿದರು.

ನ್ಯಾಯಾಲಯದ ಅಂತಿಮ ಆದೇಶದ ಸಂಪೂರ್ಣ ವಿವರ ಲಭ್ಯವಾಗುವ ಮುನ್ನ ಯಾವುದೇ ನಿರ್ಮಾಣ ಕಾಮಗಾರಿ ಕೈಗೊಳ್ಳಬಾರದು ಎಂದು ಅವರು ಒತ್ತಾಯಿಸಿದರು.

ಸಾರ್ವಜನಿಕ ಆಸ್ತಿಗಳಿಗೂ ಧಕ್ಕೆಯಾಗುವ ಆತಂಕ

ವಿವಾದಿತ 26.5 ಎಕರೆ ಜಾಗದಲ್ಲಿ ಕೃಷಿ ಭೂಮಿ ಮಾತ್ರವಲ್ಲದೆ ಸಾರ್ವಜನಿಕ ಉಪಯೋಗದ ಹಲವು ಆಸ್ತಿಗಳಿವೆ ಎಂದು ಮುಖಂಡರು ತಿಳಿಸಿದರು. ಉಪ್ಪಾರ ಸಮಾಜ ಸೇರಿದಂತೆ ವಿವಿಧ ಸಮುದಾಯಗಳು ತಲೆಮಾರುಗಳಿಂದ ಬಳಸುತ್ತಿರುವ ಸುಮಾರು 2–3 ಎಕರೆ ಸ್ಮಶಾನ ಭೂಮಿ, ಸಾರ್ವಜನಿಕ ಬಳಕೆಯ ಕೆರೆ, ಬಾರಗಟ್ಟಿ (ಬಾವಿ), ಗ್ರಾಮದ ಉತ್ತರ ಭಾಗದ ರಸ್ತೆ ಸಂಪರ್ಕ ಹಾಗೂ ಮೊರಾರ್ಜಿ ದೇಸಾಯಿ ವಸತಿ ಶಾಲೆಯ ಪಕ್ಕದ ರಸ್ತೆ ಈ ಜಾಗದ ವ್ಯಾಪ್ತಿಯಲ್ಲಿವೆ ಎಂದು ವಿವರಿಸಿದರು.

ಈ ಸಾರ್ವಜನಿಕ ಆಸ್ತಿಗಳು ಯಾವುದೇ ಕಾರಣಕ್ಕೂ ಹಾನಿಗೊಳಗಾಗಬಾರದು ಹಾಗೂ ಅವುಗಳ ಸಂರಕ್ಷಣೆಗೆ ಸರ್ಕಾರ ಆದ್ಯತೆ ನೀಡಬೇಕು ಎಂದು ಅವರು ಆಗ್ರಹಿಸಿದರು.

ನ್ಯಾಯಾಲಯದ ಲಿಖಿತ ಆದೇಶ ಹೊರಬರುವವರೆಗೆ ಯಾವುದೇ ಕಾಮಗಾರಿ ಕೈಗೊಳ್ಳಬಾರದು. ರೈತರ ಸಾಗುವಳಿ ಭೂಮಿ, ಮಠದ ಆಸ್ತಿ, ಸಾರ್ವಜನಿಕ ಸ್ಮಶಾನ, ಕೆರೆ, ಬಾವಿ ಹಾಗೂ ರಸ್ತೆ ಸೇರಿದಂತೆ ಸಾರ್ವಜನಿಕ ಹಿತಾಸಕ್ತಿಯ ಎಲ್ಲ ಆಸ್ತಿಗಳನ್ನು ಸಂರಕ್ಷಿಸಿ, ನ್ಯಾಯಾಲಯದ ಆದೇಶದಂತೆ ಮುಂದಿನ ಕ್ರಮ ಕೈಗೊಳ್ಳಬೇಕು ಎಂದು ನೀಲಗುಂದದ ಪ್ರಭುಲಿಂಗ ದೇವರು ಹಾಗೂ ಸ್ಥಳೀಯ ಮುಖಂಡರು ಸರ್ಕಾರವನ್ನು ಒತ್ತಾಯಿಸಿದರು.