SPECIAL STORY : ಕುಕನೂರು | ಬೇಸಿಗೆ ರಜೆ : ಮಕ್ಕಳ ಸುರಕ್ಷತೆಯ ಹೊಣೆಗಾರಿಕೆ ಪೋಷಕರದ್ದು  : ಪಿಎಸ್ಐ ಎಸ್.ಪಿ ನಾಯ್ಕ್ ಎಚ್ಚರಿಕೆ!

ಪ್ರಜಾವೀಕ್ಷಣೆ ಡಿಜಿಟಲ್ ವಿಶೇಷ ವರದಿ: 

​ಕುಕನೂರು, ಏಪ್ರಿಲ್ 08 : ಬೇಸಿಗೆ ರಜೆಯ ಸಂದರ್ಭದಲ್ಲಿ ಮಕ್ಕಳು ಹೆಚ್ಚಿನ ಸಮಯವನ್ನು ಹೊರಾಂಗಣದಲ್ಲಿ ಕಳೆಯುವುದರಿಂದ, ಅವರ ಸುರಕ್ಷತೆಯ ಬಗ್ಗೆ ಪೋಷಕರು ಹೆಚ್ಚಿನ ನಿಗಾ ವಹಿಸುವುದು ಅತ್ಯಗತ್ಯ ಎಂದು ಕುಕನೂರು ಪೊಲೀಸ್ ಸಬ್ ಇನ್ಸ್ಪೆಕ್ಟರ್ (ಪಿಎಸ್ಐ) ಎಸ್.ಪಿ ನಾಯ್ಕ್  ತಿಳಿಸಿದ್ದಾರೆ.

​ಶಾಲೆಗಳಿಗೆ ಬೇಸಿಗೆ ರಜೆ ಘೋಷಣೆಯಾಗಿರುವ ಹಿನ್ನೆಲೆಯಲ್ಲಿ, ಮಕ್ಕಳು ಈಜುಕೊಳ, ಕೆರೆ-ಕಟ್ಟೆಗಳು ಹಾಗೂ ನಿರ್ಜನ ಪ್ರದೇಶಗಳಿಗೆ ತೆರಳುವ ಸಾಧ್ಯತೆ ಹೆಚ್ಚಿರುತ್ತದೆ. ಇಂತಹ ಸಂದರ್ಭಗಳಲ್ಲಿ ಅಹಿತಕರ ಘಟನೆಗಳು ಸಂಭವಿಸದಂತೆ ಮುನ್ನೆಚ್ಚರಿಕೆ ವಹಿಸಲು ಪೋಷಕರು ವಿಶೇಷ ಆಸಕ್ತಿ ವಹಿಸಬೇಕೆಂದು ಅವರು ಕಿವಿಮಾತು ಹೇಳಿದ್ದಾರೆ.

​ಪೋಷಕರಿಗೆ ಎಸ್.ಪಿ ನಾಯ್ಕ್ ಅವರು ನೀಡಿದ ಪ್ರಮುಖ ಸಲಹೆಗಳು

​ಜಲ ಮೂಲಗಳ ಎಚ್ಚರ :- ಮಕ್ಕಳು ಈಜಲು ಕೆರೆ, ಹಳ್ಳ ಅಥವಾ ಬಾವಿಗಳ ಬಳಿ ಹೋಗದಂತೆ ಖಚಿತಪಡಿಸಿಕೊಳ್ಳಿ. ಈಜುವ ಬಗ್ಗೆ ಸರಿಯಾದ ತರಬೇತಿ ಇಲ್ಲದೆ ನೀರಿನ ಮೂಲಗಳ ಬಳಿ ಹೋಗುವುದು ಅಪಾಯಕಾರಿ.

ಪ್ರಯಾಣದ ಸುರಕ್ಷತೆ:- ಮಕ್ಕಳು ಸೈಕಲ್ ಅಥವಾ ದ್ವಿಚಕ್ರ ವಾಹನಗಳನ್ನು ರಸ್ತೆಯಲ್ಲಿ ಚಲಾಯಿಸುವಾಗ ಸಂಚಾರ ನಿಯಮಗಳನ್ನು ಪಾಲಿಸುತ್ತಿರುವರೇ ಎಂಬುದನ್ನು ಗಮನಿಸಿ. ಮುಖ್ಯ ರಸ್ತೆಗಳಲ್ಲಿ ಸೈಕಲ್ ಓಡಿಸದಂತೆ ಎಚ್ಚರಿಸಿ.

ಮಕ್ಕಳ ​ಸ್ನೇಹ ಬಳಗದ ಮೇಲೆ ಗಮನ :- ಮಕ್ಕಳು ಯಾರೊಂದಿಗೆ ಆಡಲು ಹೋಗುತ್ತಿದ್ದಾರೆ ಮತ್ತು ಎಲ್ಲಿಗೆ ಹೋಗುತ್ತಿದ್ದಾರೆ ಎಂಬ ವಿಷಯವನ್ನು ಸದಾ ಪೋಷಕರು ತಿಳಿದುಕೊಳ್ಳಬೇಕು. ಅಪರಿಚಿತರೊಂದಿಗೆ ಮಾತನಾಡುವುದು ಅಥವಾ ಅವರ ನೀಡುವ ತಿಂಡಿ ಪದಾರ್ಥಗಳನ್ನು ತೆಗೆದುಕೊಳ್ಳದಂತೆ ಮಕ್ಕಳಿಗೆ ತಿಳಿವಳಿಕೆ ನೀಡಿ.

ಬಿಸಿಲಿನ ತಾಪ :- ಮಧ್ಯಾಹ್ನದ ಸಮಯದಲ್ಲಿ ಬಿಸಿಲಿನಲ್ಲಿ ಆಡುವುದನ್ನು ತಪ್ಪಿಸಿ, ಮಕ್ಕಳು ಸಾಕಷ್ಟು ನೀರು ಕುಡಿಯುವಂತೆ ಪ್ರೋತ್ಸಾಹಿಸಿ.

ಡಿಜಿಟಲ್ ಸುರಕ್ಷತೆ :-  ರಜೆಯ ಅವಧಿಯಲ್ಲಿ ಮಕ್ಕಳು ಅಂತರ್ಜಾಲ ಮತ್ತು ಮೊಬೈಲ್ ಬಳಕೆಯಲ್ಲಿ ಹೆಚ್ಚಿನ ಸಮಯ ಕಳೆಯುವ ಸಾಧ್ಯತೆ ಇರುತ್ತದೆ. ಅವರು ಆನ್‌ಲೈನ್‌ನಲ್ಲಿ ಯಾರೊಂದಿಗೆ ಸಂಪರ್ಕ ಹೊಂದಿದ್ದಾರೆ ಮತ್ತು ಏನು ವೀಕ್ಷಿಸುತ್ತಿದ್ದಾರೆ ಎಂಬುದರ ಮೇಲೆ ನಿಗಾ ಇಡಿ.

​“ಮಕ್ಕಳ ಸುರಕ್ಷತೆಯು ಕೇವಲ ಪೊಲೀಸರ ಕೆಲಸವಲ್ಲ, ಇದು ಪೋಷಕರ ಮೊದಲ ಜವಾಬ್ದಾರಿಯಾಗಿದೆ. ಪೋಷಕರು ತಮ್ಮ ಮಕ್ಕಳ ದಿನಚರಿಯನ್ನು ಸೂಕ್ಷ್ಮವಾಗಿ ಗಮನಿಸುವುದರ ಮೂಲಕ ಅನೇಕ ದುರಂತಗಳನ್ನು ತಡೆಯಬಹುದು. ​ಯಾವುದೇ ತುರ್ತು ಪರಿಸ್ಥಿತಿ ಉಂಟಾದಲ್ಲಿ ಕೂಡಲೇ  ಪೊಲೀಸ್ ಠಾಣೆಯನ್ನು ಸಂಪರ್ಕಿಸಿ ಅಥವಾ ತುರ್ತು ಸೇವೆಗಾಗಿ 112 ಗೆ ಕರೆ ಮಾಡಿ”

ಎಸ್.ಪಿ ನಾಯ್ಕ್,  ಪೊಲೀಸ್ ಸಬ್ ಇನ್ಸ್ಪೆಕ್ಟರ್ (ಪಿಎಸ್ಐ) ಕುಕನೂರು ಪೊಲೀಸ್ ಠಾಣೆ. 

 ವರದಿ :- ಚಂದ್ರು ಆರ್. ಭಾನಾಪುರ್, ಸಂಪಾದಕರು ಪ್ರಜಾ ವೀಕ್ಷಣೆ ಡಿಜಿಟಲ್ ಮಾಧ್ಯಮ.