PV NEWS : ಬರದ ಪಟ್ಟಿಗೆ ಕೊಪ್ಪಳ–ಯಲಬುರ್ಗಾ ತಾಲೂಕುಗಳು: ಸೆ.19–20ರಂದು ‘ಗ್ರೌಂಡ್ ಟ್ರೂಥಿಂಗ್’!
53 ತಾಲೂಕುಗಳಲ್ಲಿ ಸ್ಥಳ ಪರಿಶೀಲನೆಗೆ ಸರ್ಕಾರದ ಆದೇಶ; ಬೆಳೆ ನಷ್ಟದ ವಾಸ್ತವಿಕ ಪ್ರಮಾಣವೇ ಮುಂದಿನ ನಿರ್ಧಾರಕ್ಕೆ ಆಧಾರ
PV NEWS ಕನ್ನಡ 24×7 | ಕೊಪ್ಪಳ
ಕೊಪ್ಪಳ, ಸೆ 17 : ಮಳೆ ಕೊರತೆ ಹಾಗೂ ಬೆಳೆ ಪರಿಸ್ಥಿತಿಯ ವೈಜ್ಞಾನಿಕ ಮೌಲ್ಯಮಾಪನದ ಆಧಾರದ ಮೇಲೆ ರಾಜ್ಯ ಸರ್ಕಾರವು ಹೆಚ್ಚುವರಿ 53 ತಾಲೂಕುಗಳಲ್ಲಿ ಬರ ಪರಿಸ್ಥಿತಿಯ ವಾಸ್ತವಿಕತೆಯನ್ನು ಪರಿಶೀಲಿಸಲು ‘ಗ್ರೌಂಡ್ ಟ್ರೂಥಿಂಗ್’ ನಡೆಸುವಂತೆ ಆದೇಶಿಸಿದೆ. ಈ ಪಟ್ಟಿಯಲ್ಲಿ ಕೊಪ್ಪಳ ಜಿಲ್ಲೆಯ ಕೊಪ್ಪಳ ಹಾಗೂ ಯಲಬುರ್ಗಾ ತಾಲೂಕುಗಳು ಸ್ಥಾನ ಪಡೆದಿದ್ದು, ಎರಡೂ ತಾಲೂಕುಗಳನ್ನು ‘Moderate’ (ಮಧ್ಯಮ) ಬರ ಪರಿಸ್ಥಿತಿಯಡಿ ಪರಿಶೀಲನೆಗೆ ಅರ್ಹವೆಂದು ಗುರುತಿಸಲಾಗಿದೆ.
ಕರ್ನಾಟಕ ರಾಜ್ಯ ವಿಪತ್ತು ನಿರ್ವಹಣಾ ಪ್ರಾಧಿಕಾರದ ಆಯುಕ್ತಾಲಯವು ಸೆಪ್ಟೆಂಬರ್ 17, 2026ರಂದು ಹೊರಡಿಸಿರುವ Ground Truthing Notification-3ರಲ್ಲಿ ಈ ಕುರಿತು ಮಾಹಿತಿ ನೀಡಿದೆ.
ವೈಜ್ಞಾನಿಕ ಮೌಲ್ಯಮಾಪನದ ಬಳಿಕ ಪರಿಶೀಲನೆ
ಕರ್ನಾಟಕ ರಾಜ್ಯ ನೈಸರ್ಗಿಕ ವಿಕೋಪ ಉಸ್ತುವಾರಿ ಕೇಂದ್ರ (KSNDMC) ಜೂನ್ 1ರಿಂದ ಸೆಪ್ಟೆಂಬರ್ 16ರವರೆಗೆ ನಡೆಸಿದ ಬರ ಮೌಲ್ಯಮಾಪನದಲ್ಲಿ, ಕಡ್ಡಾಯ ಮಾನದಂಡಗಳಾದ ಟ್ರಿಗರ್–1 ಹಾಗೂ ಪರಿಣಾಮದ ಮಾನದಂಡಗಳಾದ ಟ್ರಿಗರ್–2 ಆಧರಿಸಿ ರಾಜ್ಯದ 17 ಜಿಲ್ಲೆಗಳ 53 ತಾಲೂಕುಗಳು ಮೂರನೇ ಹಂತದ ಗ್ರೌಂಡ್ ಟ್ರೂಥಿಂಗ್ಗೆ ಅರ್ಹತೆ ಪಡೆದಿವೆ.
ಅದರಂತೆ ಕೊಪ್ಪಳ ಜಿಲ್ಲೆಯಲ್ಲಿ:
– ಕೊಪ್ಪಳ ತಾಲೂಕು – Moderate
– ಯಲಬುರ್ಗಾ ತಾಲೂಕು – Moderate
ಎಂದು ಅಧಿಸೂಚನೆಯ Annexure-Iನಲ್ಲಿ ಉಲ್ಲೇಖಿಸಲಾಗಿದೆ.
ಆದರೆ, ಗ್ರೌಂಡ್ ಟ್ರೂಥಿಂಗ್ಗೆ ತಾಲೂಕುಗಳು ಆಯ್ಕೆಯಾಗಿರುವುದು ಅಂತಿಮವಾಗಿ ಬರಪೀಡಿತ ತಾಲೂಕು ಎಂದು ಘೋಷಿಸಿರುವುದಕ್ಕೆ ಸಮನಾಗುವುದಿಲ್ಲ. ಸ್ಥಳ ಪರಿಶೀಲನೆಯ ವರದಿ ಹಾಗೂ ನಿಗದಿತ ಬರ ಮಾನದಂಡಗಳ ಆಧಾರದ ಮೇಲೆ ಮುಂದಿನ ಹಂತದಲ್ಲಿ ಅಂತಿಮ ನಿರ್ಧಾರ ಕೈಗೊಳ್ಳಲಾಗುತ್ತದೆ.
ಸೆ.19–20ರಂದು ಸ್ಥಳದಲ್ಲೇ ಪರಿಶೀಲನೆ
ಸರ್ಕಾರ ನಿಗದಿಪಡಿಸಿರುವ ವೇಳಾಪಟ್ಟಿಯಂತೆ ಸೆಪ್ಟೆಂಬರ್ 19 ಮತ್ತು 20ರಂದು ಕೊಪ್ಪಳ ಹಾಗೂ ಯಲಬುರ್ಗಾ ಸೇರಿದಂತೆ ಆಯ್ಕೆಯಾದ ತಾಲೂಕುಗಳಲ್ಲಿ ಬೆಳೆ ಪರಿಸ್ಥಿತಿಯ ಸ್ಥಳ ಪರಿಶೀಲನೆ ನಡೆಯಲಿದೆ.
ವೇಳಾಪಟ್ಟಿ ಹೀಗಿದೆ:
– ಸೆ.17: ಗ್ರೌಂಡ್ ಟ್ರೂಥಿಂಗ್ ಕುರಿತು ಅಧಿಕಾರಿಗಳಿಗೆ ಮಾಹಿತಿ
– ಸೆ.17–18: ಬೆಳೆ ಆಯ್ಕೆ, ತಂಡಗಳ ರಚನೆ ಹಾಗೂ ಗ್ರಾಮಗಳ Randomization
– ಸೆ.19–20: ಸ್ಥಳದಲ್ಲೇ ಗ್ರೌಂಡ್ ಟ್ರೂಥಿಂಗ್ ಪರಿಶೀಲನೆ
– ಸೆ.21: ಪರಿಶೀಲನೆ ಪೂರ್ಣಗೊಳಿಸಿ Form-11 ಸಲ್ಲಿಕೆ
ಪರಿಶೀಲನೆಯ ವೇಳೆ ಬೆಳೆಗಳ ಸ್ಥಿತಿ, ಬೆಳೆ ನಷ್ಟದ ಪ್ರಮಾಣ, ಜಿಯೋ-ಟ್ಯಾಗ್ ಛಾಯಾಚಿತ್ರಗಳು, GPS ಸ್ಥಳಾಂಕ, ಜಮೀನಿನ ವಿವರ ಹಾಗೂ ಮಾಲೀಕತ್ವದ ಮಾಹಿತಿಯನ್ನು ದಾಖಲಿಸಲಾಗುತ್ತದೆ.
33%ಕ್ಕೂ ಅಧಿಕ ಬೆಳೆ ನಷ್ಟ ನಿರ್ಣಾಯಕ
ಬರ ಪರಿಸ್ಥಿತಿ ನಿರ್ಧಾರದಲ್ಲಿ ಬೆಳೆ ನಷ್ಟದ ಪ್ರಮಾಣ ಪ್ರಮುಖ ಮಾನದಂಡವಾಗಿದೆ. ಗ್ರೌಂಡ್ ಟ್ರೂಥಿಂಗ್ನಲ್ಲಿ 33% ಅಥವಾ ಅದಕ್ಕಿಂತ ಹೆಚ್ಚಿನ ಬೆಳೆ ನಷ್ಟ ಕಂಡುಬಂದರೆ ಸಂಬಂಧಿತ ತಾಲೂಕು ಬರ ಘೋಷಣೆಗೆ ಅರ್ಹತೆ ಪಡೆಯಬಹುದು.
ಇನ್ನು ಬೆಳೆ ನಷ್ಟವು 50%ಕ್ಕಿಂತ ಹೆಚ್ಚಾದರೆ, ಬರದ ತೀವ್ರತೆಯನ್ನು ‘Severe’ ಎಂದು ಪರಿಗಣಿಸುವ ಅವಕಾಶವಿದೆ. ಅಲ್ಲದೆ, ಶೇಕಡಾ 80 ಅಥವಾ ಅದಕ್ಕಿಂತ ಹೆಚ್ಚಿನ ಗ್ರೌಂಡ್ ಟ್ರೂಥಿಂಗ್ ಪರಿಶೀಲನೆಗಳಲ್ಲಿ ಬೆಳೆ ನಷ್ಟವು 50%ಕ್ಕಿಂತ ಹೆಚ್ಚಿರುವುದು ದೃಢಪಟ್ಟರೆ, Manual for Drought Management, 2020ರ ಮಾರ್ಗಸೂಚಿಗಳ ಅನ್ವಯ ‘Moderate’ನಿಂದ ‘Severe’ ವರ್ಗಕ್ಕೆ ಹೆಚ್ಚಿಸುವ ಅವಕಾಶವೂ ಇದೆ.
ಈಗಾಗಲೇ 101 ತಾಲೂಕುಗಳು ಬರಪೀಡಿತ
ಇದಕ್ಕೂ ಮುನ್ನ ಮೊದಲ ಹಂತದ ಗ್ರೌಂಡ್ ಟ್ರೂಥಿಂಗ್ ಆಧಾರದ ಮೇಲೆ ಆಗಸ್ಟ್ 27, 2026ರಂದು ರಾಜ್ಯದ 101 ತಾಲೂಕುಗಳನ್ನು ಬರಪೀಡಿತ ಎಂದು ಘೋಷಿಸಲಾಗಿತ್ತು. ಈ ಪೈಕಿ 89 ತಾಲೂಕುಗಳನ್ನು ‘Severe’ ಹಾಗೂ 12 ತಾಲೂಕುಗಳನ್ನು ‘Moderate’ ಬರಪೀಡಿತ ತಾಲೂಕುಗಳೆಂದು ವರ್ಗೀಕರಿಸಲಾಗಿತ್ತು.
ಇದೀಗ KSNDMCಯ ಮುಂದುವರಿದ ಮೌಲ್ಯಮಾಪನದಲ್ಲಿ ಮತ್ತಷ್ಟು 53 ತಾಲೂಕುಗಳು ಗ್ರೌಂಡ್ ಟ್ರೂಥಿಂಗ್ ಹಂತಕ್ಕೆ ಪ್ರವೇಶಿಸಿವೆ.
ಮುಂಗಾರು ಮುಗಿಯುವವರೆಗೂ ಬರ ಪರಿಸ್ಥಿತಿ ಪರಿಶೀಲನೆ
ದಕ್ಷಿಣ–ಪಶ್ಚಿಮ ಮುಂಗಾರು ಅವಧಿ ಪೂರ್ಣಗೊಳ್ಳುವವರೆಗೂ ರಾಜ್ಯದಲ್ಲಿ ಬರ ಪರಿಸ್ಥಿತಿಯ ಮೌಲ್ಯಮಾಪನ ಮುಂದುವರಿಯಲಿದೆ ಎಂದು ಅಧಿಸೂಚನೆಯಲ್ಲಿ ತಿಳಿಸಲಾಗಿದೆ. ಸೆಪ್ಟೆಂಬರ್ನ ಮಳೆ ಪ್ರಮಾಣ, ಬೆಳೆಗಳ ಸ್ಥಿತಿ ಹಾಗೂ ಮುಂದಿನ ದಿನಗಳ ಪರಿಸ್ಥಿತಿಯನ್ನು ಆಧರಿಸಿ KSNDMC ವಾರದ ಆಧಾರದ ಮೇಲೆ ಬರ ಪರಿಸ್ಥಿತಿಯನ್ನು ಪರಿಶೀಲಿಸಲಿದೆ.
ಮುಂದಿನ ಮೌಲ್ಯಮಾಪನಗಳಲ್ಲಿಯೂ ಬರ ಮಾನದಂಡಗಳನ್ನು ಪೂರೈಸುವ ತಾಲೂಕುಗಳನ್ನು ಗುರುತಿಸಿ, ಅಗತ್ಯವಿದ್ದಲ್ಲಿ ಗ್ರೌಂಡ್ ಟ್ರೂಥಿಂಗ್ ಸೇರಿದಂತೆ ಮುಂದಿನ ಕ್ರಮಗಳನ್ನು ಕೈಗೊಳ್ಳುವ ಪ್ರಕ್ರಿಯೆ ಮುಂದುವರಿಯಲಿದೆ.
ರೈತರ ದೃಷ್ಟಿಯಲ್ಲಿ ಮಹತ್ವದ ಎರಡು ದಿನ
ಕೊಪ್ಪಳ ಮತ್ತು ಯಲಬುರ್ಗಾ ತಾಲೂಕುಗಳ ರೈತರ ಪಾಲಿಗೆ ಸೆಪ್ಟೆಂಬರ್ 19 ಮತ್ತು 20ರಂದು ನಡೆಯಲಿರುವ ಗ್ರೌಂಡ್ ಟ್ರೂಥಿಂಗ್ ಅತ್ಯಂತ ಮಹತ್ವದ ಹಂತವಾಗಿದೆ. ಈ ಸ್ಥಳ ಪರಿಶೀಲನೆಯಲ್ಲಿ ದಾಖಲಾಗುವ ಬೆಳೆ ನಷ್ಟದ ವಾಸ್ತವಿಕ ಅಂಕಿ-ಅಂಶಗಳು ಎರಡೂ ತಾಲೂಕುಗಳ ಬರದ ತೀವ್ರತೆ, ಮುಂದಿನ ಬರ ಘೋಷಣೆ ಹಾಗೂ ಸರ್ಕಾರದ ಪರಿಹಾರ ಕ್ರಮಗಳಿಗೆ ಪ್ರಮುಖ ಆಧಾರವಾಗಲಿವೆ.
