FLASH NEWS : ಬೀಗ ಹಾಕಿದ ಮನೆಗಳಿಗೆ ಇನ್ನು ಪೊಲೀಸರ ಕಾವಲು: ‘ಲಾಕ್ಡ್ ಹೌಸ್’ ಬೀಟ್ ಸಿಸ್ಟಮ್ ಲೋಕಾರ್ಪಣೆ!
ಪ್ರಜಾವೀಕ್ಷಣೆ ಡಿಜಿಟಲ್ ಸುದ್ದಿ :
ಕೊಪ್ಪಳ (ಕುಕನೂರು) ಏ. 30 : ಸಾರ್ವಜನಿಕರು ರಜೆ ಅಥವಾ ಕಾರ್ಯನಿಮಿತ್ತ ಮನೆಗೆ ಬೀಗ ಹಾಕಿ ದೂರದ ಊರುಗಳಿಗೆ ತೆರಳಿದಾಗ, ಕಳ್ಳತನದ ಭಯವಿಲ್ಲದೆ ನಿಶ್ಚಿಂತೆಯಿಂದ ಇರಲು ಪೊಲೀಸ್ ಇಲಾಖೆಯು ಅತ್ಯಾಧುನಿಕ ‘ಲಾಕ್ಡ್ ಹೌಸ್’ ಬೀಟ್ ಸಿಸ್ಟಮ್ (LHBS) ಅನ್ನು ಅಧಿಕೃತವಾಗಿ ಲೋಕಾರ್ಪಣೆ ಮಾಡಿದೆ.
ಏನಿದು ಲಾಕ್ಡ್ ಹೌಸ್ ಬೀಟ್ ಸಿಸ್ಟಮ್?
ಸಾಮಾನ್ಯವಾಗಿ ಹಬ್ಬದ ದಿನಗಳಲ್ಲಿ ಅಥವಾ ಬೇಸಿಗೆ ರಜೆಯ ಸಂದರ್ಭದಲ್ಲಿ ಬೀಗ ಹಾಕಿದ ಮನೆಗಳನ್ನೇ ಗುರಿಯಾಗಿಸಿಕೊಂಡು ಕಳ್ಳತನಗಳು ನಡೆಯುತ್ತವೆ. ಇದನ್ನು ತಪ್ಪಿಸಲು ಪೊಲೀಸರು ತಂತ್ರಜ್ಞಾನ ಆಧಾರಿತ ಗಸ್ತು ವ್ಯವಸ್ಥೆಯನ್ನು ರೂಪಿಸಿದ್ದಾರೆ. ಮನೆಯ ಮಾಲೀಕರು ತಾವು ಊರಿಗೆ ಹೋಗುವ ಮುನ್ನ ಪೊಲೀಸ್ ಇಲಾಖೆಯ ಮೊಬೈಲ್ ಆ್ಯಪ್ ಅಥವಾ ಹತ್ತಿರದ ಪೊಲೀಸ್ ಠಾಣೆಯಲ್ಲಿ ಮಾಹಿತಿ ನೀಡಿದರೆ, ಅಂತಹ ಮನೆಗಳನ್ನು ವಿಶೇಷ ನಿಗಾ ಪಟ್ಟಿಗೆ ಸೇರಿಸಲಾಗುತ್ತದೆ.
ಹೇಗೆ ಕೆಲಸ ಮಾಡುತ್ತದೆ ಈ ವ್ಯವಸ್ಥೆ?
ಕ್ಯೂಆರ್ ಕೋಡ್ ಅಳವಡಿಕೆ : ಮಾಹಿತಿ ನೀಡಿದ ಮನೆಯ ಮುಂಭಾಗದಲ್ಲಿ ಪೊಲೀಸರು ಒಂದು ವಿಶಿಷ್ಟ ಕ್ಯೂಆರ್ ಕೋಡ್ (QR Code) ಅಳವಡಿಸುತ್ತಾರೆ. ರಾತ್ರಿ ಅಥವಾ ಹಗಲು ಗಸ್ತಿನಲ್ಲಿರುವ ಪೊಲೀಸರು ಆ ಮನೆಗೆ ಭೇಟಿ ನೀಡಿದಾಗ, ಕ್ಯೂಆರ್ ಕೋಡ್ ಅನ್ನು ಸ್ಕ್ಯಾನ್ ಮಾಡಬೇಕು. ಇದು ಅವರು ಆ ಜಾಗಕ್ಕೆ ಭೇಟಿ ನೀಡಿರುವುದನ್ನು ಕಂಟ್ರೋಲ್ ರೂಮ್ಗೆ ಖಚಿತಪಡಿಸುತ್ತದೆ.
ಲೈವ್ ಅಪ್ಡೇಟ್ : ಪೊಲೀಸರು ಮನೆಗೆ ಭೇಟಿ ನೀಡಿದ ತಕ್ಷಣ, ಮನೆಯ ಮಾಲೀಕರ ಮೊಬೈಲ್ಗೆ “ಪೊಲೀಸರು ನಿಮ್ಮ ಮನೆಯನ್ನು ಪರಿಶೀಲಿಸಿದ್ದಾರೆ” ಎಂಬ ಸಂದೇಶ ರವಾನೆಯಾಗುತ್ತದೆ. ಇದರಿಂದ ಊರಿನಲ್ಲಿರುವ ಮಾಲೀಕರಿಗೂ ನೆಮ್ಮದಿ ಸಿಗುತ್ತದೆ.
ಈ ಸೇವೆಯನ್ನು ಪಡೆಯಲು ಇಚ್ಛಿಸುವ ಸಾರ್ವಜನಿಕರು ಈ ಕೆಳಗಿನ ಕ್ರಮಗಳನ್ನು ತಪ್ಪದೇ ಅನುಸರಿಸಬೇಕು.
ಮುನ್ಸೂಚನೆ : ಊರಿಗೆ ಹೋಗುವ ಕನಿಷ್ಠ 24 ಗಂಟೆಗಳ ಮೊದಲು ಸಂಬಂಧಪಟ್ಟ ಪೊಲೀಸ್ ಠಾಣೆಗೆ ಮಾಹಿತಿ ನೀಡಬೇಕು.
ಆ್ಯಪ್ ಬಳಕೆ : ಇಲಾಖೆಯ ಅಧಿಕೃತ ಸುರಕ್ಷಾ ಆ್ಯಪ್ನಲ್ಲಿ ‘Locked House’ ಆಯ್ಕೆಯನ್ನು ಆಯ್ದುಕೊಂಡು ಹೆಸರು ಮತ್ತು ವಿಳಾಸ ನಮೂದಿಸಬೇಕು.
ಸಿಸಿಟಿವಿ ಕನೆಕ್ಷನ್ : ಲಭ್ಯವಿದ್ದಲ್ಲಿ ಮನೆಯ ಸಿಸಿಟಿವಿ ದೃಶ್ಯಗಳನ್ನು ತಾತ್ಕಾಲಿಕವಾಗಿ ಸ್ಥಳೀಯ ಬೀಟ್ ಪೊಲೀಸರ ಗಮನಕ್ಕೆ ತರಬಹುದು.
“ಸಾರ್ವಜನಿಕರ ಆಸ್ತಿಯ ಸುರಕ್ಷತೆ ನಮ್ಮ ಆದ್ಯತೆ. ಈ ಡಿಜಿಟಲ್ ಬೀಟ್ ಸಿಸ್ಟಮ್ನಿಂದಾಗಿ ಮನೆಯ ಮಾಲಕರು ನಿಶ್ಚಿಂತೆಯಿಂದ ಇರಬಹುದು. ಇದರಿಂದ ಕಳ್ಳತನದ ಪ್ರಕರಣಗಳನ್ನು ಶೇ. 95ರಷ್ಟು ತಡೆಯಬಹುದು. ಸಾರ್ವಜನಿಕರು ಇದರ ಸದುಪಯೋಗ ಪಡಿಸಿಕೊಳ್ಳಿ”
ಎಸ್.ಪಿ. ನಾಯ್ಕ್, ಠಾಣಾಧಿಕಾರಿ (ಪಿಎಸ್ಐ),
ಕುಕನೂರು ಪೊಲೀಸ್ ಠಾಣೆ.
ಸಾರ್ವಜನಿಕರ ಶ್ಲಾಘನೆ:-
“ಇಷ್ಟು ದಿನ ಊರಿಗೆ ಹೋದರೆ ಮನೆಯಲ್ಲಿರುವ ಚಿನ್ನಾಭರಣ, ಬೆಲೆಬಾಳುವ ವಸ್ತುಗಳ ಬಗ್ಗೆಯೇ ಚಿಂತೆಯಾಗುತ್ತಿತ್ತು. ಈಗ ಪೊಲೀಸರೇ ನಮ್ಮ ಮನೆಯ ಕಾವಲುಗಾರರಾಗುತ್ತಿರುವುದು ತುಂಬಾ ಸಂತೋಷದ ವಿಷಯ” ಎಂದು ಕಿರಣ್ ಕುಮಾರ್ ನಿವಾಸಿಯೊಬ್ಬರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
